And vnto seth al þus he said:
Line 352
"Wepes namore, bot bese still,
For þus it es my lordes will,
Þat I sal teche here ȝow vnto
How ȝe with þis cors sall do;
Line 356
Takes him vp and wendes with me,
For in erth sall he bereed be."
Þai toke þe cors vp þam omang,
And þe angels bifore gan gang
Line 360
Singand all ful solempnely,
And makand nobill melody;
To þe vale of ebron þai him broght
And groue him þare, als þam gude thoght.
Line 364
Þan al his barnes awonderd ware
Of þe sight þat þai saw þare;
Þe angel said þan to þam in hy,
"Of þis thing haues no ferly,
Line 368
For als we now do him vnto
So sal ȝe with ȝowre ded men do;
Gers beri þam in erth or stane,
For all sall di þat life [MS. lift.] has tane."
Line 372
Seth þan opon þa kirnels thoght,
Þat he fra paradis had broght;
In his fader mowth he þam did
Als þe angell gan him bid;
Line 376
Of þa kirnels thurgh goddes grace
Wex thre wandes in litill space,
And of þa wandes grete ferlis fell,
Als men may here me efter tell;
Line 380
Ful mekill sele was to þam sent,
Als men may here wha takes entent;
De tribus uirgis in ore ade crescentibus
In adams mouth þir wandes stode,
Till tyme of noie efter þe flode,
Line 384
Þat was to wit with-outen were,
A thowsand sexty and twelue ȝere;
