De obitu primi parentis ade.
When seth had wroght all on þis wise
And cumen hame fra paradise,
Vntill his fader fast gan he fare,
Als he lay in sekenes sare,
Line 320
And tald vnto him albidene
How he had done whare he had bene,
And how þe angell gan him hete
Þat he suld haue his bale to bete,
Line 324
Oile of mercy fra god send
To saue him in þe werldes end.
When adam herd him sogat say,
Þa wordes ful gretely gan him pay,
Line 328
And in his life þan anes he logh,
For he hopid forto win fra wogh,
And forto be saued sertainely;
Þarfore to god þus gan he cry,
Line 332
"Lord me list no langer lif,
Mi gaste in-to þi hend I gif
Forto wis it at þi will,
In whilk stede so it sall go till."
Line 336
Þus he died with-in þe thrid day
Als þe angell vnto seth gan say;
Þan had he lifed in þis werld here
Nien hundreth and threty ȝere;
Line 340
For mans kinde was þan so strang,
Þat þai moght wele lif so lang.
When he was ded þus als I tell,
Both wife and barnes opon him fell [folio 78b]
Line 344
And lay opon þe cors criand,
Heuid to heuid and hand to hand,
Þai trowed to turn life him vntill,
For þai kowth þan none oþer skill;
Line 348
And als þai murned with dreri mode,
Michaell come and by þam stode,
And oþer angels gudely graid,
