Loke they be Armyd and redy dight,
For it is sothe that thou me tolde,
We haue be-gonne thys ilke nyght
That shall brynge many A man full colde."
Line 1887
Bors than spake with drery mode:
"Syr," he sayd, "sithe it is so,
We shalle be of hertis good
Aftyr the wele to take the wo."
Line 1891
The knyghtis sprent as they were wode
And to there harneise gon the go;
At the morow Armyd be-fore hym stode
An hundrethe knyghtis and squyers mo.
Line 1895
Whan they were armyd and redy dight,
A softe pas forth gonne they Ride,
As men that were of mykelle myght,
To A forest there be-syde;
Line 1899
Launcelot Arrayes All hys knyghtis
And there they loggen hem to byde
Tylle they herd of the lady bryght, [folio 110a]
What Auntere of hyr shulde be-tyde.
Line 1903
Mordreit than toke A way full gayne,
And to the forest wente he Right,
Hys Auntures tolde, for sothe to sayne,
That were by-fallyn that ylke nyght.
Line 1907
"Mordreit, haue ye that treitour slayne,
Or how haue ye with hym dight?"
"Nay, syr, bot dede is aggrawayne,
And so Ar All oure other knyghtis."
Line 1911
Whan it herde syr gawayne,
That was so hardy knyght and bolde,
"Allas! is my brother slayne?"
Sore hys herte be-gan to colde;
Line 1915
