And most worshipfull in all fyghtis,
To the nedefull helpinge & profitable,
The mayde of Ascalot to Rightis
Sendith gretinge, with-outen fable:
Line 1055
To you all my playnte I make
Off the wronge that me is wroghte, [folio 101b]
But noght in maner to vndir-take
That Any of you shold mend it ought;
Line 1059
Bot onely I say for this sake,
That, thoughe this world were throw sought,
Men shold nowhere fynd your make,
All noblisse to fynde that myght be sought;
Line 1063
There-fore to you to vndirstand
That, for I trewly many a day
haue lovid lelyest in lond,
Dethe hathe me fette of this world away;
Line 1067
To wete for whome yif ye will found,
That I so longe for in langoure lay,
To say the sothe will I noght wound,
For gaynes it not for to say nay;
Line 1071
To say you the sothe tale,
For whome I haue suffred this woo,
I say deth hathe me take with bale
For the noblest knight þat may go;
Line 1075
Is none so doughty dyntis to dale,
So Ryalle ne so fayre ther-to;
But so churlysshe of maners in feld ne hale
Ne know I none of frende ne fo;
Line 1079
Off foo ne frend, the sothe to say,
So vn-hend of thewis is ther none;
his gentillnesse was all a-way,
All churlysshe maners he had in wone;
Line 1083
