Atte king he toke leue þo;
Into Sessoyne he is ygo.
¶ Now he is comen to þe douk Reyner,
Line 1685
Þat him loued and held dere;
He him vnder-feng wiþ worþschipe,
& dede him miche manschipe.
So long in þat cuntre bileued he is,
Þat ouer alle oþer he is praised y-wis.
Line 1690
Gij him biþouȝt þo
Þat he hadde þer y-nouȝ ydo:
Into Inglond he wald wende, [folio 116b:1]
For to speke wiþ his frende;
For it was ago fif ȝer
Line 1695
Þat he was last þer; [C line 1290]
In lasse while þan þat was
Might falle mani wonder cas.
Þurch cuntres has he hadde y-went,
Quens and cuntas him haþ of-sent,
Line 1700
Ac non of hem he nold sikerliche
Bot Felice þat he loued so miche.
What for his miȝt and his godenisse,
For his nortour and his largesse,
Þer nis kniȝt þat so miche preysed be
Line 1705
Unto Antiage, þat riche cite.
¶ Gij him spedde niȝt & day;
Into Inglond he toke þe way.
Of Gij ichil lete now,
And more after y schal tel ȝou;
Line 1710
Of Herhaud ichil telle astounde
Þat wele is heled of his wounde.
When he feld him hole & fere,
Of þabot he tok his leue þer;
His lord Gij he goþ secheing
Line 1715
Niȝt & day, him for to finde:
Toward Inglond he tok his way,
Crist him saue, so wele he may!
