To an ermite he is y-go,
Þat he was ere aqueynted to;
His woundes þer hele he dede [folio 116a:2]
Wiþouten noise in that stede.
Line 1650
Miche he him dradde þe douk Otoun, [MS. of toun.]
So ful he was of tresoun.
¶ Þabot of whom ich er of teld, [C line 1253]
On Herhaud he hadde gret rewþe to biheld;
He dede beren his body
Line 1655
Into a chamber to vnarmy.
A monk of þe house biheld him,
Bodi & heued & ich a lim.
Þilke monk sorgien was,
Þe vertu he knewe of mani a gras;
Line 1660
Þe wounde he biheld stedefastliche,
Þat in his body was so griseliche.
Bi the wounde he seye y-wis
Þat to þe deþ wounded he nis,
& seye þat he hym hele miȝt;
Line 1665
& so he dede ful wele, y pliȝt.
Bi þe moneþ ende at eue
Gij was al hole & toke his leue
From þe gode ermite, he went his way
Toward Poile, also þe way lay. [C line 1272]
Line 1670
To þe king he is icome
Þat him bede mani warisone,
& miche tresour of siluer & of gold;
Ac Gij þerof non haue no wold.
At ich plas & turnament
Line 1675
Gij hadde þe priis verrament. [C line 1286]
Was þer non in al þat lond,
Þat his dent miȝt astond.
Þer-fore men loued him swiþe miche,
& vnder-fenge him bleþeliche;
Line 1680
Alle gode men he was leue & dere,
& wiþ hem alle pleye-fere.
