His leeue he toke withoute more;
Line 1215
The erle it forthoughte full sore.
He gooth him to his fader thoo,
That for his goyng was full woo:
'Fader,' quoth Guy, 'goo y wille:
For noo thing y woll lette by skille;
Line 1220
Yiue me leeue, y woll not spare
Ouer the See for to fare,
To wynne pris and losse also, [Caius MS. 107 page 39]
As a yonge man in his youghte shuld doo.
To abide longe in this contree
Line 1225
It is not worthe noo thing to me;
For a yonge man that is mighti
In his youthe shuld make bowne and redy,
So that in age he may bee preised,
And so to honour to bee arreised.
Line 1230
Whiles that y am yonge and lighte,
My name y shall encrese by my mighte.'
'LEEF SONE,' he seide, 'lete bee that thoughte:
Yet shall thou wende noughte.
Thou shalt abide here with me;
Line 1235
All the gladder y may bee.'
'Leef sone,' his moder him seide,
'Doo by thy faders rede:
Abide with vs here to yere mo,
I rede the, sone, thou so doo.
Line 1240
Another yere thou may ouere fare.
And bot thou doo thus, y dye for care,
For we ne haue sones moo:
And yf we shuld nowe the forgoo,
Gladde ne shuld we neuere bee,
Line 1245
Bot for sorowe oure self slee.'
Guy answerd with that speche,
'Fader, god y you beteche,
And my moder y doo also;
For hastely y woll goo.'
Line 1250
