To his lemman he is well-come,
And him to kisse she maketh hir bowne.
The Erle proferd him siluer and golde,
And noothing therof take he wolde.
Line 1110
Full gladde is his fader of him
And his moder and all his kynne,
And all the folke of that Contree
Were gladde him for to see.
ON A DAYE he is to Felice goo,
Line 1115
And full louyngly he seith hir too:
'I am come as thou may see.
My lif y haue, lemman, thurgh thee:
Ne were thou, lemman, dede y were,
My body destroied and leide on bere.
Line 1120
Armes y toke for loue of the,
Thoo thy wille thou tolde me,
That, whan y had armes take,
Thou woldest not than me for-sake.
And thou hast herde me preised bee
Line 1125
In many astraunge contree:
Thy loue shuld not me bee werned,
For y haue it, me thinketh, ayerned.
Sweting, nowe y am come to the,
Thy wille therof thou telle me.'
Line 1130
FELICE answerd swithe on highe, [Caius MS. 107 page 36]
And iaped not with sir Guye:
'Yet art thou not preised so,
Bot y kanne fynde suche other moo.
Stronge thou art and of grete mighte,
Line 1135
Good and hardy and kene in fighte:
And if y the had my loue yiue,
And wille it the whiles y liue,
Sleuthe wolde the so ouerecome,
That thou woldest nomore armes doon,
Line 1140
Ne come in turnement nor in fighte.
So amerous thou wolde bee anone righte.
