Two sweynes Guy cleped him to,
Line 1035
To theim he seide and bade also,
That they with that presentȝ shuld fonde [Caius MS. 107 page 33]
Assone as they might in-to Englonde
And presente therwith in his worde
The Erle Rouhaude, his kynde lorde.
Line 1040
Whan they herde what Guy theim bade,
Full redy thei made theim with hert glade.
They wente than in-to Englonde:
At Warrewik the Erle there they fonde.
The White Girfauk and the stede,
Line 1045
The two Greyhoundes that by theim yede,
To the Erle they made their present;
And that Guy it wanne at the turnement
All they haue the Erle telde,
And that he was the best in the felde,
Line 1050
And that he was moste sette by
Of all the knyghtis in Normandy,
And that the Emperrour doughter with all than
Hadde him chose to hir lemman.
WHANNE the Erle herde this,
Line 1055
Full gladde he was therof, ywis,
That Guy so moche preised was.
His fader thanked god of that cas:
Felice the faire did also,
Whan the tidinges were tolde hir to.
Line 1060
All his frendes olde and yinge
Were full gladde of that tidinge.
Tho wente Guy in-to farrer londe
Turnementis and ioustes for to fonde.
In Almaigne and in Lombardie,
Line 1065
In Fraunce and in Normandie.
Ther was noo turnement, ywis, [Caius MS. 107 page 34]
Bot he was therat and had the pris.
He was oute more than a yere:
Thurgh all londes men preised him there
Line 1070
