& so þou miȝt awreke be,
His londes destru, him seluen sle.
Of werre no swike wille we,
Al what he a-slawe be.'
'Amis,' quaþ Gij, 'god ȝeld it te: [C line 5769]
Line 6085
To long schuld ich here be.
Ȝif ich orn on him so þou speke, [folio 140a:a]
To late ich worþ of him awreke.
For drede of deþ nille y fle.
Hastiliche ichil awreken be.'
Line 6090
Al a day he bileft þare,
His hert was in michel care:
Amis emforþ his miȝt
Confort him boþe day and niȝt.'
¶ Of him he toke his leue þo,
Line 6095
Toward Paui he is y-go.
Amis wiþ him gon wold,
Ac he seyd þat he no schold.
Amis bileft, þat was sori,
& often to god he bad for Gij,
Line 6100
Þat for his swete moder loue
Leue him harmeles oȝain come.
¶ Gij him diȝt in a-queyntise, [C line 5785]
& com to Paui in squier wise.
An vnement purchast he
Line 6105
Þat made his visage out of ble:
His here, þat was ȝalu and briȝt,
Blac it bicome anon riȝt.
Nas no man in þis world so wise of siȝt
Þat afterward him knowe miȝt.
Line 6110
Now to Paui y-comen he is:
Of no man aferd he nis.
Þe douk Otus he fond þere,
& gret him as ȝe may here:
'Sir douk Otus,' he seyd, 'god loke þe:
Line 6115
Al so ich it wold so mot it be.
