[6-text p 259]
Thend of þis caytif was as I schal say
his foomen made a fest vpon a day
And made him as here fool biforn hem play [folio 228b]
And þis was in a temple of gret array
Line 3272
But/ atte last he made a foul affray
For he two pilers schook and made hem falle
And doun fel temple and al and þer it lay
And slough himsilf and eek his fomen alle
Line 3276
This is to sayn þe princes euer ichon
And eek þre þousand bodies were þer slayn
with fallyng of þe grete temple of stoon
Of Sampson wil I no more sayn
Line 3280
Be war by þese ensamples olde and playn
That no man telle his counseil to his wyf
Of such þing as he wold haue secre fayn
If/ þat/ it touche his lymes or his lif
Line 3284
[Hercules.]
Of Ercules þe souereyn conquerour [¶ De Ercule]
Singing his werkes laude and heigh renoun
For in his tyme of strength he bar þe flour
he slough and rafte þe skyn fro þe leoun
Line 3288
he of Centaures layde þe bost a doun
he arpies slough þe cruel briddes felle
The gold appul he raft fro þe dragoun
he drof out cerbures þe fend of helle
Line 3292
He slough þe cruel tyrant bupherus
And made his hors to frete him fleisch and boon
he slough þe verray serpent venencus
Of Adiloyus tuo hornes he raft oon
Line 3296
he slough Catus in a caue of stoon
he slough þe geaunt adeus þe stronge
he slough þe grisly leoun and þat anoon
And bar þe heed vpon his necke longe
Line 3300
