[6-text p 188]
Vpon his beere ay lith þis Innocent
Line 1825
Biforn þe chief auter whiles þe masse last
And after þat þabbot with his couent
Haþ sped him for to burie him ful fast
And whan þay halywater on him cast
Line 1829
Ȝet spak þis child. whan spreynde was þe water
And song O alma redemptoris mater
Line 1831
This abbot which þat was an holy man
Line 1832
As monkes ben or elles oughte be
This ȝonge child to coniure he bigan
And sayd O deere child I halse þe
In vertu of þe holy trinite
Line 1836
Tel me what is þy cause for to synge
Sith þat þy throte is kit at my semynge
Line 1838
My þrote is kit vnto my nekke boon
Line 1839
Sayde þis child and as by way of kynde
I schulde han ben deed long tyme a goon
But Ihū crist as ȝe in bookes fynde
wol þat his glorie laste and be in mynde
Line 1843
And for þe worschip of his moder deere
Ȝet may I synge. O alma lowde and cleere
Line 1845
This welle of mercy cristes moder swete
Line 1846
I loued alway as after my connynge
And whan þat I my lyf schulde leete
To me sche cam and bad me for to synge
This antym verraily in my deyinge [folio 203a]
Line 1850
As ȝe haue herd and whan þat I had songe
Me þought sche layde a grayn vnder my tonge
Line 1852
Wherfor I synge and synge moot certeyne
Line 1853
In honour of þat blisful mayden fre
Til fro my tonge taken is þe greyne
And after þat þus saide sche to me
