Ther as þe Carpenter was wont to lye
Ther was þe Reuel and þe melodye [folio 49a]
Line 3652
And þus lith alisoun and Nicholas
In busynesse of myrþe and of solas
Til þat þe belles of laudes gan to rynge
And freres in þe Chauncel gan to synge
Line 3656
This parissch clerk þis amerous absolon
That is for loue so harde and woo bygon
vpon þe Monday was at Osenay
with company him to desporte and play
Line 3660
And axed vpon caas a cloysterer
Ful pryuely after þe carpenter
And he drough him a part out of þe chirche
And sayde nay I say him nat here wirche
Line 3664
Syn satirday I trow þat he be went
For tymber þer our abbot hath him sent/
For he is wont for tymber for to goo
And dwellen at þe graunge a day or tuo
Line 3668
Or elles he is at his hous certayn
wher þat he be I can nat soþly sayn
This absolon ful ioly was and light
And thoughte now is tyme wake al night
Line 3672
For sikerly I sawh him nought styryng
Aboute his dore syn day bigan to spryng
So mote I þryue I schal at Cokkes crowe
Ful pryuely go knokke at his wyndowe
Line 3676
That stant ful lowe vpon his bowres wal
To alisoun þan wol I tellen al
My loue-longyng for ȝet I schal not mysse
That atte leste wey I schal hir kisse
Line 3680
Som maner comfort schal I haue par fay
My mouth haþ icched al þis longe day
That is a signe of kissyng atte leste
Al nyght I mette eek I was at a feste
Line 3684
Ther fore I wol go slepe an hour or tweye
And al þe night þan wol I wake and pleye
