[6-text p 678]
[1019] þou schalt not eke make no lesinge in þi confessione; ffor humilite peraduenture to seie þat þou hast done sinnes of whiche þou were neuer gilte [1020] ¶ For seinte seiþe; If þou because of humylite makest lesinge of þi self þouhe þou ne were nouȝt in sinne a forne ȝit ert þou þan in sinne þoruhe þi lessinges [1021] ¶ þou muste eke schewe þi sinne by þi propre mouþe bot þou be wax domme; & nouht be no letter; ffor þou þat hast don sinne þou schalt haue þe same confesse [1022] ¶ þou schalt nouȝt eke peynte þi confession be faire & subtile wordes to keuer þe more þi sinne; ffor þan begiles þou þi self & not þe priste; þou most tel it platlye be it neuere so foule ne so orrible; [1023] þou schalt schriue þe eke to a priste þat is discrete to counseil þe; & eke þou schalt nouht schriue þe for veyne glorye ne for ypocrisye ne for no cause bott onely for þe deute of ihesu criste; & þe hele of þi soule; [1024] ¶ þou schalt not eke rinne to þe priste al sodenly to tel him þine sinne as who so telleþ a Iape or a tale; bo avysyly & wiþe grete deuocyon; [1025] & generaly schriue þe ofte. [folio 253b] if often fall of arise be confessione; [1026] & if þou schriue þe ofter þan ones of sinne of whiche þou haste bue schryuen it is þe more merite & as seiþe seint Austine; þou schalte haue þe more lyhtly relesinge & þe grace of god boþe of sinne & of peyne; [1027] An certes ones a ȝere att þe lest weye it is lawful for to bue houselde; for soþely ones al þinges renouellen;
De Satisfaccione
[1028]
NOw haue .I. tolde of verrey confession þat is þe secunde parte of penitence;
