[6-text p 185]
Þouhe þat .I. for my primer schal be schent
And schal be beten þries in an oure
.I. will. it conne oure lady for to honoure
Line 1733
¶ His felawe tauht him homward priuely
fro day to day til he couþe it be rote.
And þanne he songe it wele and boldely
ffro warde to warde accordeinge to þe note [folio 187b]
Line 1737
Þreys on a daye it passed þoruhe his þrote
To scoleward and homwarde when he went
On cristes moder sette was his entent
Line 1740
¶ As I haue seide þoruhe oute þe Iewrye
This litel Childe as he cam to and fro
fful merily þan wolde singe and crye
On alma redemptoris euer mo
Line 1744
The swettnesse haþe his herte perced so
Of cristes moder þat to hire to preie
He can nouht stinte of singinge be þe waie
Line 1747
¶ Owre ferst foo þe serpent Satanas
Þat haþe in Iewes his waspes neste
Vp swal and seide O Ebrayke peple alas
Is þis a þinge to ȝowe þat is honest
Line 1751
Þat suche a boye schal walken as him lest
In ȝoure and singen of suche sentence
Whiche is aȝeines ȝoure lawes reuerence.
Line 1754
¶ ffro þens forþ þe Iewes han conspirede
This Innocent of þis werlde to chace
In homicide haunt þei þere-to huyrede
one That in a leye hadde a priue place
Line 1758
And as þe childe gan forby for to pace
This cursed Iewe him hente and helde fast
And kutte his þrote and in a pute him cast
Line 1761
