[6-text p 321]
He can no counsel kepe it is no drede
Now kepe ȝowe fro þe white and fro þe reede
Namely fro þe white wyne of lepe
þat is to sel in fische strete or in chep
Line 564
þis wyne of Spayne crepeþ Sotelly
In oþer wynes groweinge fast by
Of whiche þere riseþ suche fumosite
þat whan a man haþ dronke drauhtes þre
Line 568
And weneþ þat he be att home in chepe
He is in spayne riht atte þe toune of lepe
Nouht att þe Rochel ne att Bordeux toune
And þan wille þei seyn Sampsone Sampsone
Line 572
Bot herken lordeynges o worde .I. ȝow preie
þat al þe souereigne attes dar .I. seie
Of victories in þe olde testament
þat þoruhe verrey god þat is omnipotent
Line 576
Weere done in abstinence and in preiere
Loke þe bible and þere ȝe maie it leere.
Loke Atthela þe grete conqueroure
Deyed in his slepe wiþ schame and dishonoure
Line 580
Bledeynge aye att is nose in dronkenesse
A Capeteigne schold leue in soburnesse
And ouer al þis a-vise ȝow riht wele
What was comand vn-to Lamuele
Line 584
Nouht Samuel bot Lamuel saie .I.
Redeþe þe bible and findeþ it expresly
Of wyne ȝifinge to hem þat han Iustice
No mor of þis for it mai wele suffice
Line 588
A now þat .I. haue spoke of glotonye
Nowe wil .I. defend ȝowe hasardye
Hasard is verreye moder of lesinges
And of deceyte Cursed forswereinges
Line 592
Blaspheme of criste and mansleinges also
Of bataile oft time and of oþer mo
It is repreue and contrarie to honoure [folio 176b]
ffor to be holde a commune hasardoure
Line 596
