Incipit prologus questoris [on leaf 173]
Owre Oste gan swere as he ware wode
Harrowe quod he be Nayles and be blode
Line 288
This was a cussed þef a fals Iustice
A schendful deþe as hert can deuise
So fal vpon his body and his bones [[*]]
Þe deuel .I. be-ken him al att ones [[*]]
Line 292
Alas to dere bouht sche hir beute
Wherefor .I. seie þat al men maie see
þat ȝiftes of fortune or of Nature
Beþe cause of deþe of mony a creature
Line 296
Hire beute was hir deþe .I. dare wele seine
Alas how pitously as sche was sleine
Bot here-of wil .I. nouht procede as nowe [[spurious]]
Men haue ful often more harme þan prowe
Line 300
Bot trewly myne owen maister dere
This is a pitous tale for to here
Bot naþeles pas ouer is no force
.I. praie to god to saue þi gentil corps
Line 304
And þine vrinals and þi Iordanes
Þine ypocras and þine Galiounes
And euery box ful of þine letuarie
God blesse hem and oure lady seint Mary
Line 308
So mot .I. þe þou ert a propre man
And ylike a prelate · be seinte Runyan
Sayd .I. nouht wele can .I. nouȝht speke in terme
Bot wele .I. wote þou doste myne herte to erme
Line 312
þat .I. almost haue cauht a cardiacle
Be corpus bones bot ȝiue .I. haue triacle
Or elles a drauht of moiste and corne ale
Or bott .I. here a-none a meri tale
Line 316
