[6-text p 430]
¶ And of ȝowre newe wif god of his grace
Line 841
So graunt ȝowe wele and hihe profperite
For .I. wil gladly ȝelden hire my place
In whiche .I. was blisful wonte to be
Line 844
For seþe it likeþ ȝowe my lorde quod sche
That whilom were al myn hertes rest
That .I. schal go .I. wil go whan ȝoue lest
Line 847
¶ Bot þere as ȝe me profer suche dowaire
Line 848
As .I. fist brouht it is wele in my mynde
It were my wreched cloþes noþinge faire [folio 124b]
The whiche to me were nowe ful hard to finde
Line 851
O goode god howe gentil and howe kinde
Ȝe Semed be ȝoure speche and be ȝoure visage
The daie þat maked was oure mariage
Line 854
¶ Bott soþe is seide al gate .I. finde it trewe
Line 855
For in effecte it proued is on me
Loue is nouht olde as whan þat it is newe
Bot certes lorde for none aduersite
Line 858
To deien in þe caas it schal nouht be
Þat euer in worde or werke .I. schal repent
Þat .I. ȝowe ȝafe myne herte in hole entent
Line 861
¶ Lorde ȝe wote þat in my faders place
Line 862
Ȝe dide me stripe out of my poure wede
And richely me cladden of ȝoure grace
To ȝowe brouht .I. not elles out of drede
Line 865
Bot feiþe and nakednes and maidenhede
And here aȝeine ȝoure cloþinge .I. restore
And eke ȝowre weddinge ringe for euer more
Line 868
¶ Þe remenant of ȝoure Iewels redi be
Line 869
Wiþþe in ȝoure chambre dar .I. sauely seine
Naked oute of my faders house quod sche
.I. cam and naked .y. mote aȝeine
Line 872
