[6-text p 338]
Than were þei maade vpon a creature
To purge vryne and eke for engendrure
Bot .I. sei nouȝt þat euery wyht is holde [folio 89a]
þat haþe suche hernays as .I. to ȝow of tolde
Line 136
To gone and vsen hem in engendrure
Than scholde men take of chastite no cure
Criste was a mayden and schapen as a man
And mony a seinte soþþ þat þis werlde began
Line 140
Ȝit leued þei euer in perfite charite
.I. nyl envye wiþ no virginite
Lete hem ete brede of pured whete sed
And late vs wyues ete barly brede
Line 144
And ȝit wiþ barly brede Marke tel can
Owre lorde ihesu refrissched mony a man
In suche astate þat god haþ cleped vs
.I. wil perseuere .I. am nouht precious
Line 148
In whifehode wil .I. vse myne Instrument
As frely as my maker haþ it sent
If .I. be daungerous god gif me sorwe
Myne husbond schal it haue boþe eue and morwe
Line 152
Whan þat him luste com forþe and paie his dette
An husbond .I. wil haue .I. wil not lette
Whiche schal be boþe my dettour and my þrall
Line 155
And haue his tribulacione wiþ all [¶ Ad Corinthios .vijo. vir sui corporis potes|tatem non habet set mulier.]
Vpon his flesche while þat .I. am his wif
.I. haue þe powere dureinge al my lif
Vpon his propre body and not he
Riht þus þe Apostle tolde to me
Line 160
And bad owre husbondes for to loue vs wele
Al þis sentens me likeþ euery dele
Vp stert þe pardoner and þat anone
Nowe dame quod he be god and be seinte Iohn
Line 164
Ȝe bue a noble prechoure in þis cas
.I. was aboute to wed a wif alas
What schold .I. by it on my flesche so dere
Ȝit had .I. leuere none wedde to ȝere
Line 168
