[6-text p 497]
In singne of treuþe þat is in wemme[n] seene.
And al wiþe-oute þe mewe is peynted grene
In whiche war peynted as þis fals fowles
As bien þis tideues tarseletz and owles.
Line 648
Riht for dispite was peinted hem by side [folio 87a]
Pyes on hem for to crie and Chide
Thus lete .I. Canace hir hauke kepeinge
.I. wil no more nowe speke of hire ringe
Line 652
Til it come eft to purpos for to seine
Howe þat þis fawkon gatt hir loue aȝeine
Repentant as þe storie telleþ vs
Be Mediacion of Camballus
Line 656
þe kinges son of whiche .I. ȝowe tolde
Bot hense forþe .I. wil proces holde
To speken of aventures and of batailes
þat ȝit was neuer herde so grete merveiles
Line 660
ffirst wil .I. tell ȝowe of Cambynskan
That in his time mony a Cite wan
And after wil .I. speke of Algarsif
Howe þat he wanne Theodora to his wif
Line 664
For whan ful oft in grete perile he was
Ne had he bue holpen be þe hors of bras
And after wil .I. speke of Camballo
Þat fauht in listes wiþ þe breþerne tuo
Line 668
ffor Canace ar þat he my[ht] hir wynne
And þere .I. left .I. þenke aȝeine be-gynne
Line 670
Bot .I. wil here nowe maake a knotte [[8 spurious lines]]
To þe time it come next to my lotte
For here be felawes behinde an hepe treulye
þat wolden talke ful besilye
Line 4
And haue her sporte as wele as .I.
And þe daie passeþ fast certanly
Therefore oste takeþ nowe goode heede
Who schall next tell and late him speede
Line 8
Explicit fabula Armigeri.
