[6-text p 187]
Ȝaf in hire þought wiþ-in a litel space
þat in þat place after hire sone sche cryede
þer he was caste in a putte besyde
Line 1796
¶ O grete lord þat parformed þin laude
By mouþ of Innocence lo here þy might
This gemme of chastite þis Emeraude
And eek of martirdome þe ruby bright
Line 1800
þer he wiþ þrote y-korue lay vpright
he alma redemptoris gan to synge
So loude þat al þe place gan to rynge
Line 1803
¶ The cristen folk þat þurgh þe strete went
In comen for to wondren on þis þing
And hastely þey for þe prouost sent
he came anon wiþouten eny taryyng
Line 1807
And herieþ crist þat is of heuen king
And eek his mooder honour of mankynde
And after þat þe Iewes let he bynde
Line 1810
This childe wiþ pitous lamentacion
vp taken syngyng his song alway
And with honour and gret procession /
They carien him to þe next abbay [folio 214a]
his moder swownyng by þe bere lay
vnneþes mighte þe poeple þat was þere
This newe rachel bringe fro his bere
Line 1817
Wiþ torment and with schameful deþ ilkon
This prouost doþ þis Iewes for to sterue
That of þis moerdre wiste and þat anon
he nolde non such cursednesse obserue /
Line 1821
Euel schal haue þat euel wol deserue
þerfore with wilde hors he dede him drawe
And after þat he hynge him by þe lawe
Line 1824
