[6-text p 186]
¶ I say þat in a wardrobe þey him drewe /
Wher as þise Iewes purgen entraille
O cursed folk of heroudes al newe /
What may ȝoure euyl entent ȝou auayle /
Line 1765
Mordre wole out certain it wol nought fayle
And namely þere honour of god schulde sprede
þe blood out cryeþ on ȝour cursed dede
Line 1768
¶ O martyr sonded to virginite
Now maystow syngen folwyng euer in oon
The white lambe celestial quod he /
Of which þe grete euaungelist seint Iohn
Line 1772
In Pathmos wrot which seiþ þey þat gon
Byforn þis lambe and synge a song al newe
þat neuer fleisschly wommen þey knewe
Line 1775
¶ þis pore wydewe wayteþ al þat night
After þis litel childe but hom cam he nouȝt
ffor whom as sone as it was dayes light [folio 213b]
Wiþ face pale for drede and busy þought
Line 1779
Sche haþ at scole and elles wher him sought
Til fynally sche gan so fer aspye
þat he was seyn last in þe Iewerye
Line 1782
¶ With moodres pyte in hire brest enclosed
Sche goþ as þough sche were half out of mynde /
To euery place where sche haþ supposed
By lyklyhede hire childe for to fynde
Line 1786
And euer on cristes moder meke and kynde
Sche cryed and at þe laste þus sche wrought
Among þe cursed Iewes sche him sought
Line 1789
Sche freyneþ and sche preyeþ pitously
To euery Iewe þat dwelt in þilke place
To telle hire if hire child went hem by
They sayden nay but ihesus [[MS ihc]] of his grace
