[6-text p 438]
¶ O tendre o dere o ȝonge children myne
Line 1093
ȝour woful moder wende stedefastly
That cruel houndes or som foul vermyne
hadde eten ȝou but god of his mercy
Line 1096
And ȝoure benigne fader tenderly
haþ don ȝou kepte and in þe same stounde
Al sodeinly sche swapte a doun to grounde
Line 1099
¶ And in hire swowne so sadly holdeþ sche
Line 1100
hire children tuo whan sche gan hem enbrace
þat with gret sleighte and wiþ gret difficulte
þe children from hire arm þei gon arace
Line 1103
O many a teer on many a pitous face
Doun ran of hem þat stooden hire besyde
vnneþe aboute hire mighten þey abyde
Line 1106
Walter hir gladeþ and hir sorwe slakeþ
Line 1107
Sche ryseþ vp abaysshed from hire traunce
And euery wight hire ioye and feste makeþ
til sche haþ caught aȝein hir contenance
Line 1110
Walter hire doþ feiþfully plesaunce
þat it is deynte for to se þe cheere
Bitwixe hem tuo now þey ben mett in feere
Line 1113
¶ This ladyes whan þat þey here tyme saye
Line 1114
han taken hire and in to chambre goon
And streepen hire out of hire ruyde array
And in a cloþ of gold þat brighte schoon
Line 1117
Wiþ a coroune of many a riche stoon
vppon hire heed þey in to halle hir broughte [folio 144a]
And þan sche was honoured as sche oughte
Line 1120
¶ Thus haþ þis pitous day a blisful ende
Line 1121
ffor euery man and womman doþ here might
This day in mirþe and reuel to dispende
Til on þe welken schone þe sterres bright
Line 1124
