[6-text p 434]
¶ Nat oonly lord þat I am glad quod sche
Line 967
To do ȝoure lust but I desire also
ȝou for to serue and plese in my degre
Wiþouten feynyng and schal eueremo
Line 970
Ne neuer for no wele ne no woo
Ne schal þe goost wiþinne myn herte stente
To loue ȝou best/ wiþ al my trewe entente
Line 973
¶ And wiþ þat word sche gan the house to dighte
Line 974
And tables for to sette and beddes make [folio 142a]
And peyned hire to do al þat sche mighte
Preyinge þe chambereres for goddes sake
Line 977
To hasten hem and faste swepe and schake
And sche þe moste seruisable of alle
haþ euery chambre arrayed and his halle
Line 980
¶ Abouten vndren gan þis erl alighte
Line 981
And wiþ him brought his noble children tweye
ffor wiþ þe poeple ran to see þe sight
Of hire array so richely byseye
Line 984
And þan at erst amonges hem þey seye
That walter was no fool þough þat him liste
To chaunge his wyf for it was for þe beste
Line 987
¶ ffor sche is fairer as þey demen alle
Line 988
þan is Grisilde and more tendre of age
And fairer fruyt betwen hem schulde falle
And more plesaunce for hire heih lynage
Line 991
hire broþer eek so fair was of visage
That hem to se þe poeple haþ cauȝt plesaunce
Commendynge now þe marquys gouernaunce
Line 994
¶ O stormy poeple vnsad and euer vntrewe
Line 995
Ay vndiscrete and chaungyng as a fane
Delityng ay in rombile þat is newe
ffor lik þe mone ay wexen ȝe and wane
Line 998
