[6-text p 433]
þer can no man in humblesse him aquite
As wommen can ne can be half so trewe
As wommen ben but it be falle of newe
Line 938
[PART VI.]
¶ ffro Boloigne is þis erl of Panyke come / [folio 141b]
Of which þe fame vp sprong to more & lesse /
And to þe poeples eres alle and some /
Was couþ eek þat a newe marquysesse
Line 942
he wiþ him brought in such pompe and richesse
That neuer was þer seyn wiþ mannes eye
So noble array in al west lumbardye
Line 945
¶ The marquys which þat schope and knew al þis
Line 946
Or þat þis erl were come sent his message
ffor þilke sely pore Grisildis
And sche with humble herte and glad visage
Line 949
nouȝt wiþ no swollen herte in hire corage
Cam at his heste and on hir knees hir sette
And reuerently and wysly sche him grette
Line 952
¶ Grisildis quod he my wille is vtterly
Line 953
þis mayden þat schal be wedded to me
Receyued be to morn als really
As possible is in myn hous for to be
Line 956
And eke þat euery wight in his degre
haue his astat in sittyng and seruise
And heih plesaunce as I can best deuyse
Line 959
¶ I haue no womman sufficaunt certayn
Line 960
þe chambres for to arraye in ordinance
After my lust and þerfore wolde I fayn
Thyn were al such maner gouernance
Line 963
þou knowest eek of olde al my plesaunce
þough þin array be badde and yuel beseye
Do þou þi deuer atte leste weye
Line 966
