[6-text p 424]
¶ ȝe ben oure lord doþ wiþ ȝour owne þing
Line 652
Riȝt as ȝou liste askeþ no rede at me
ffor as I lifte at home al my cloþinge
Whan I first come to ȝou right so quod sche
Line 655
lefte I my wille and al my liberte
And tok ȝour cloþing wherfore I ȝou preye
Doþ ȝour plesance I wil ȝour lust obeye
Line 658
¶ And certes if I hadde prescience
Line 659
ȝoure wille to knowe or ȝe ȝour lust me tolde
I wolde it do wiþouten necligence
But now I wot ȝour lust and what ȝe wolde
Line 662
Al ȝour plesaunce ferme and stable I holde
ffor wiste I þat my deþ wolde do ȝou ese
Right gladly wolde I deye ȝou to plese
Line 665
¶ Deþ may not make no comparisoun
Line 666
vnto oure loue and whan þis marquys say
þe contenaunce of his wijf he cast a doun
his eyȝen tuo and wondreþ þat sche may
Line 669
In pacience suffre al þis array
And forþ he goþ wiþ drery contynaunce
But to his herte it was right gret plesance
Line 672
¶ þis Oggel sergaunt in þe same wise
Line 673
þat he hir douȝter caughte right so he
Or worse if men worse can deuyse
haþ hent hir sone þat ful was of beaute
Line 676
And euer in oon so pacient was sche
That sche no cheere made of heuynesse
But kiste hir sone and after gan it blesse
Line 679
¶ Saue þis sche preyed him if þat he mighte
Line 680
hir litel sone he wolde in erþe graue
his tendre lymes delicat to sight
ffro foules and fro bestes for to saue
Line 683
