[6-text p 414]
¶ No wonder is þouȝ þat sche were astoned
Line 337
To se so gret a geste in þat place
Sche neuer was to suche gestes woned
ffor which sche loked wiþ ful pale face
Line 340
But schortly forþ þis mater for to chace
This aren þe wordes þat þe marquys sayde
To his benigne verray feyþful mayde
Line 343
¶ Grisilde he seyde ȝe schule wel vnderstonde
Line 344
It likeþ to ȝoure fader and to me
That I ȝou wedde and eek it may so stonde
As I suppose ȝe wil þat it so be
Line 347
But þese demaundes ax I first quod he
¶ þat siþþen it schal be don in hasty wise
Wille ȝe assente or elles ȝou auyse
Line 350
I seye þis be redy wiþ good herte
Line 351
To al my lust and þat I frely may
As me best þinkeþ do ȝou knowe or smerte
And neuer þe to grucche it night ne day
Line 354
And eek whan I say ȝe ne say not nay
Neiþer by word ne by frounyng contynance
Swere þis and heer I swere oure alliance
Line 357
¶ Weddyng vpon þis word quakyng for drede
Line 358
Sche sayde lord vndigne or vnworþy
Am I to þat ilke honour þat ȝe me bede
But as ȝe wille ȝoure self right so wol I
Line 361
And here I swere þat neuer willyngly
In werk ne þought I nyl ȝou disobeye [folio 133b]
ffor to be deed þough me were loþ to deye
Line 364
¶ This is ynough Grisylde myn quod he
Line 365
And forþ he goþ wiþ a ful sobre cheere
Out at þe dore and after þat cam sche
And to þe poeple he sayde in þis manere
Line 368
