And next folwyng bigynneth his tale of Gresilde. [MS Arch. Seld. B. 14, on leaf 66]
Ther was in the weste side of ytaylle
down at the rote / of Vesulus the colde
a lusty playne / habundaunte of vitaylle
where many a toure and towne / thow maist biholde
Line 60
that founded were / in tyme of faders olde
and many a-nother / dilectable sight
and Saluces / this noble contre hight
Line 63
A Marques whilom / was lord of that londe
Line 64
as were his worthi eldres / him bifore
and obeysaunte / ay redy to his honde
were alle his liges / both lesse and more [MS Arch. Seld. B. 14 folio 66b]
Line 67
thus in delite he lyved / and hath done yore
biloued and drad / thorugh favour of fortune
both of his lordis / and of his comune
Line 70
¶ Therwith he was / to speken of lynage
Line 71
the gentilest borne / of al Lumbardye
a faire persone and strong / and yonge of age
and ful of honoure / and of curtesie
Line 74
discrete I-nough / his contre for to gye
saue in som thingis / he was to blame
and Walter was this yonge lord-is name
Line 77
¶ I blame him thus / that he considred noughte
Line 78
in tyme comyng / what myghte him betide
but on his lust present / was al his thoughte
as for to havke and hounte / on euery side
Line 81
wel nygh al other cures / lete he slide
and eke he nolde / and that was worst of alle
wedde no wiff / for aughte that myghte bifalle
Line 84
