[6-text p 497]
In signe of trouþe þat is in wommen seene
And alle wiþoute þe muwe is peynted greene
In which were peynted alle þese false fowles
As ben þise tydifs tercelettes and owles
Line 648
Right for þe spyte were peynted hem bysyde
Pyes on hem for to crye and chyde
Thus leet I Canacee hire hawk keeping
I wole nomore as now speke of hire ryng
Line 652
Til it come eft to purpos for to seyn
how þat þis ffaukon gat hire loue ageyn
Repentant as þe storie telleþ vs [folio 99b]
By mediacion of Camballus
Line 656
The kinges sone of which I yow tolde /
But hennes forth I wol proces holde
To speke of auentures and of batailles
That yet was neuer herde so gret meruailles
Line 660
ffirst wil I telle yow of Kambynskan
That in his tyme many a cite wan
And after wol I speke of Algarsif
how þat he wan Theodora to his wyf
Line 664
ffor whan ful ofte in gret peril he was
Ne hadde he ben holpen by þe hors of bras
And after wol I speken of Camballo
That faught in listes with þe breþeren tuo
Line 668
ffor Canacee er þat he might hir wynne
And þer I lefte I wol ageyn bygynne
Appolo whirleth vp his char so hye [Apollo i. sol.]
Til þat þe god mercurius hous þe slye /
¶ Explicit .ija. pars.
