[6-text p 488]
þeigh alle þe world hadde þe contrarie swore
he schal not þennes be þrowe ne y-bore
Of if yow liste bidde him þennes gon
Trille þis pynne and he wil vanyssche anon
Line 328
Out of þe sight of euery maner wight
And come ayein be it day or night
whan þat yow list to clepen him agayn
In swich a gyse as I schal to yow sayn [folio 95a]
Line 332
Bitwixen yow and me and þat ful soone
Ryd whan yow list þer is no more to doone
Enformed whan þe kyng was of þe knight
And haþ conceyued in his witt aright
Line 336
The maner and þe forme of alle þis þing
fful glad and bliþe þe noble doughty kyng
Repeyryng to his reuel as biforn
The brydel is in to þe tour y-born
Line 340
And kept among his Ieweles lief and diere
The hors vanyssht y not in what manere
Out of here sight ye gete namore of me
But þus I lete in lust and Iolite
Line 344
This Kambynskan his lordes festeynge
Til wel neigh þe day bigan to springe
¶ Explicit prima pars
¶ The Stag of an hert
¶ The norice of digestion is slepe
Gan on hem wynke and bad hem take kepe
Line 348
That moche mete and labour wol haue reste /
And with a galpyng hem alle he keste /
And seyde þat it was tyme to lye a doun
ffor blood was in his dominacion
Line 352
Cherissheþ blood natures frend quod he
þey þanken him galpynge by tuo by þre
And euery wight gan drawen him to his reste
As sleep hem bad þey tooke it for þe beste
Line 356
