Page 125
The Cook of london whil þe Reue spak
ffor ioye he þoughte he clawed him on þe bak
ha ha quod he for cristes passioun
This meller haþ a scharp conclusioun
Line 4328
vpon his argument of herbergage
We[l] seide Salamon in his langage/
Ne bryng nat euery man in to þin hous
ffor herberwyng be night is perilous
Line 4332
Wel oughte a man auysed for to be
Whom þat he broughte in to his priuite
I praie to god so yeue me sorwe and care
If euere sithen I highte hogge of of ware
Line 4336
herde I mellere bettre y-set a werke
he hadde a Iape of malice in þe derke/
And þerfore if ȝe vouche sauf to heere/
But god forbede þat we stynte heere
Line 4340
A tale of me þat am a pouere man
I wol yow telle as wel as euer I can
A litel Iape þat fil in oure Citee
Oure oost answerde and seide I graunte it þe
Line 4344
Now telle on Roger loke þat it be good
ffor many a paste hast þou latyn blood
And many a Iakke of Douer hast þou sold
That haþ ben twyes hoot and twyes cold
Line 4348
Of many pilgrym hastow cristes curs
ffor of þy persely ȝit þey fare þe wors
þat þei haue eten wiþ þe stubbul goos
ffor in þy schoppe is many a flye loos
Line 4352
Now tel on gentil Roger by þi name
But yet I preye þe be not wroþ for game
A man may say ful soth in game and play
Thou seist ful soþ quod Roger by my fay [folio 61b]
Line 4356