[6-text p 137]
¶ And he answerde raþer þan I leese
Custance I wol be cristned douteles
I mot ben hires I may non oþer cheese
I pray ȝow holdeþ ȝour argumentz in pees
Line 228
Saueþ my lif and beþ nought Recheles
To geten hire þat haþ my lif in cure
ffor in this woo I may not longe endure
Line 231
¶ What nedeþ grettere dilatacion
I seie by tretys and embassadrie/
And by þe popes mediacion
And alle þe chirche and alle þe chiualrie
Line 235
That in distruction of mawmattrie
And in encres of cristes lawe deere
They ben accorded so as ȝe schal heere/
Line 238
¶ how þat þe Sowdan and his Baronage
And alle his lieges schold y-cristened be/
And he schal han Custance in mariage
And certein gold y not what quantite
Line 242
And herto founden sufficeant seurte
This same accord was sworn in either syde
Now faire Custance almighty god þe gyde
Line 245
Now wolde sommen waiten as I gesse/
That I schulde tellen al þe purueance
That þe Emperour of his noblesse
hath schapen for his doughter dame Custance
Line 249
Wel may men knowe þat so gret ordinance
May noman tellen in a litel clause
As was arrayed for so heigh a cause
Line 252
¶ Bisschoppes ben schapen wiþ hire for to wende
lordes ladies knightes of renoun
And oþer folk ynowe þis is þe ende
And notified is þurgh out þe toun [folio 77b]
