[6-text p 671] for to exemplice thilke brennynge delit [folio 438a] they rekke neuere how ofte Sootly it is dedly synne. And that with sorwe some folk wele peynyn hem more to doon; than here apetit suffisyth.
[944] ¶ The secunde manere of chastite is / for to been a cleene wedewe / & eschewe the enbrasyngis of man / And desyre the enbrasyngis of Ihesu crist / [945] These been tho that han been wyuys And han forgetyn here hus|bondys. And ek wemen that han doon lecherye. & been resseyuyd be penytence. [946] And certis ȝif that a wyf coude kepyn hire al chast by lycence of hire husbonde / So that sche ȝeue noon occasyoun that he agilte it were to hire a greet merite. [947] This manere of wemen that obseruyn chastite . . . . . [no gap in the MS.] in clothynge & in cuntenaunce abstinent in etynge & drynkynge in spekynge & in deede they been the vessel or the Boyste of the blyssede Magdelyn that fulfillyth holy cherche of good odour [948] ¶ The iij manere of chastite; is vyrgynyte / & it be-houyth that it be holy in herte and cleene of body thanne is sche spouse to Ihesu crist. And sche is the lyf of aungellis / [949] Sche is the preysynge of this world / And sche is as these martyrys egalyte / sche hat in hire that tunge may not telle / ne herte thynke / [950] Virginyte bar oure lord Ihesu crist. And virgyne was hym selue.
[951] ¶ Anothir remedye ageyn lecherye is this / specyally to withdrawe sweche thyngis as ȝeuyn occasioun to thilke vilenye as ese etynge & drynkynge. ffor certis whan the pot boylyth strongely; the beste remedye is to with|drawe the feer [952] Slepynge longe in greet quyete; is ek a gret noryce to lecherye
[953] ¶ A nothir remedye a-geyn lecherye is that a man or a woman eschewe the cumpaygnye of hem be whiche he doutyth to been temptyd / For al be it so / that the dede is withstonden ȝit is theere greet temptacioun
