[6-text p 662] wynnyth he the more party of this world [851] And ryght as a marchaunt delytith hym most in chaffare that he hath most auau[n]tage of. ryght so dely [folio 434a] tith the feend in this ordure
[852] ¶ Thys is that othir hand of the deuyl with .v. fyngerys / to cache the peple to his vilanye / [853] The ferst fyngir is / the fool lokynge of the fool woman. And of the fool man. that sleth rygh as the Baselycok sleth folk by the venyn of his syth. for the coueytyse of eyen; folwith the coueytyse of the herte. [854] ¶ The secunde fyngir is the vyleyns touchynge in wekede manere And therfore seyth Salomon. that ho so touchith a woman or handelith; he farth lyk to hym that handelyth the skorpyoun that styngith & sodeynly sleth thour his enuenymynge. As ho so touche warm pych. it schent hise fyngerys [855] The thredde is foule wordys. that farth lyk fuyr that rygh a-non brennyth the herte. [856] The fourte fynger is. the kyssynge. And trewely he weere a greet fool that wolde kysse the mouth of a brennynge ouene or of a forneys [857] And moore folys been they. that kessyn in vilenye. for that mouth is the mouth of helle. and namely these olde dotardys holouris ȝit wole they kisse and smatere hem thow they may nat doon. [858] Certis they been lyke to houndys. for an hound whan he comyth by the roser. or by othere beauteis. thow he may not pisse. ȝit wele he heue vp his leg and make a cun|tenau[n]ce to pisse. [859] And for that manye men wenyth. that he may not synne for no lykerousnesse that he doth with his wif. Certis ȝit the opynyoun is fals God wot a man may sleen hym self. with his owene knyf And make hym self dronke of his owene ale or of his owene wyn. [860] Certis be it wif be it child. or ony wordely thyng that he louyth by-forn god. it is his maumet. & he is an ydolastre. [861] Man schulde louyn his wif by dyscrecyoun paciently. & attemprelly. And thanne is sche as they it
