[6-text p 617] And therfore the loue of euerithyng / that is not be set in god / ne doon principally for godis sake; al thow a man loue it lasse than god / ȝit is it venyal synne / [367] And dedly synne / whan the loue of ony thyng/ wegheth in the herte of man / as meche as the loue of god or moore / [368] ¶ Dedly synne as [seyth] seynt austyn / is whan a man turnyth his herte from god / whiche that is verray souereyn bounte / that may not schaunge / & ȝewith his herte to thyng that may schaunge & flitte [369] & certis / that is euery thyng saue god of heuene for soth is ȝif a man ȝeue his loue / whiche that he owith al to god / with al his herte / vn-to a creature / certis as meche of his loue as he ȝeuyth to that ilche creature / so meche he be-reuyth from god / [370] And ther|fore doth he synne / for he that is dettour to god / ȝildyth not al his dette to god / that is to seyne / al the loue of his herte
[371] ¶ Now sithe man vndyrstonde / generally whiche is venyal synne thanne is it couenable / to telle specially of synnys whiche that manye a man / parauenture ne demyth hem no synnys & schryuyth hym not of the same synnys / And ȝit natheles they been synnys [372] Sothly as these clerkis wryte / this is to seyne that at euery tyme / that man etith or drenkyth moore than suffiseth to the sustenaunce / of his body in certeyn he doth synne / [373] And ek whan he spekyth more than hym nedith / it is synne ek / whan he herkenyth not [[not later]] be|nygnely to the compleynt of the poore / [374] ek whan he is in hele of body / And wele not faste whan othere folk faste / with-oute cause resonable / eek whan he slepith more than nedith / or whan he comyth be thilke enchesoun to late to cherche / or to [folio 411b] othere werkis of charitee / . [375] eek whan he vseth his wif with-outyn souereyn desyr of engenderure to the honour of god / or for the entent to ȝilde his wif the dette of his body / [376] Ek whan he wele not visite the sike or the prisounner / ȝif he may /
