[6-text p 616] so consentynge departith god fro man / And thanne wele I sleen hym with myn hand / in dede of synne / thus seyth þe fend [357] For certis thanne is a man al deed / in soule / & thus is synne accompleschid with temp|tacioun / bi delyt & be concentynge / & thanne is the synne clepid actuel
[358] ¶ fforsothe synne is in two manerys / othir it is venyal or dedly / synne / Sothly whan man louyth ony thyng more than Ihesu Crist oure creature; thanne is it / dedly synne / And venyal synne / is it / ȝif man loue Ihesu Crist lesse than hym ouȝte / [359] forsothe the dede of this venyal synne is wol parlyous / for it amenuseth the loue that a man schulde haue / to good moore & more [360] And therfore ȝif a man scharge hym self / with manye sweche venyal synnys / certis but ȝif so be that he sum|tyme dyscarge / hym of hem be schrifte the mowe ful lightely / amensyn in hem al the loue that he hath / to Ihesu crist / [361] & in this wyse skippith venyal in to dedly synne / For certis the more that a man schargyth hys soule with venyal synnys; the moore is he enclynyd to dedly synnne [362] And therefore lete vs not be to necligent to discharge vs / of venyal synnys / for the prouerbe seith That manye smale makyn a greet [363] ¶ And herkene this ensaumple / A greet wawe of the se comyth sumtyme with so greet a violence / that it drenchith the schip / And the same doth sumtyme the smale dropis of watir that enteryn thorw a lytil crauas in the thurrok & in the boteme of the schip If men ben so necligent that men ne scharge hem not be tyme / [364] And therefore al thow theere be a differens be twethe these two causys / of dren [folio 411a] chynge; algate the schip is drenkt [365] ¶ Ryght so faryth it sumtyme / of dedly synne / And of noyouse venyal synne / whan they multiplie in man / so greetly that theyilke wordely thyngis that he louyth thorw whiche he synnyth he synnyth venyally / is as greet in his herte / as the loue of god / or moore / [366]
