[6-text p 263]
In al that land magicien was non
That coude expoungne what these letterys mente
But danyel expoungnede it a-noon
And seyde kyng god to thyn fadyr sente
Line 3400
Glorie & honour / regne tresor rente
And he was proud / & no thyng god ne dradde
And therfore god greet 1wreche1 [[1_1 corrected]] on hym sente
And hym berafte / the regne that he hadde
Line 3404
He was out cast of manny cumpaynye
With assis was his habytacioun
And eet hay as a beste / in weet & drye
Tyl that he knew by grace & by resoun
Line 3408
That god of heuene hath domynacioun [folio 355b]
Of euery regne / & euery creature
And thanne hadde god of hym compascioun
And hym restorede his regne & his figure
Line 3412
Ek thow that art his sone art proud also
And knowist alle these sygnys verrayly
And art rebel to god & art his foo
Thow drank ek of hise wellys boldely
Line 3416
Thyn wyf ek & thynne wenchis synfully
Dronke of the same vessel sundery wynys
And heryist false goddis cursedely
Therfore to the I-schapyn ful greet pyne is
Line 3420
This hand was sent from god that on the wal
Wroot mane techel phares trust to me
Thyn regne is doon thow weyest noght at al
Deuidit is thyn regne / & it schal bee
Line 3424
To Medes & to perses ȝeuyn quod he
And tilke same nyȝt this kyng was slawe
And Daryus ocupied his degree
Thow he thereto hadde neythir ryȝt ne lawe
Line 3428
