The Cambridge ms (University library, Gg. 4.27) of Chaucer's Canterbury tales / edited by Frederick J. Furnivall.

Sequitur Gula

[folio 432a]

[Two figures, of a man, 'Glotenye', riding on a bear or sloth?, and of a woman, 'Abstinence', crownd and halo'd, with a jug in the right hand, and a flower in the left. See the Society's Chaucer Autotypes, Part 2.]

[818] AFtir Auarice comyth Glotenye whiche is expres ek a-geyns the comaundement of god Glotenyee/ is vnmesurable apetit to ete or to drynke or ellis to don I-now to the onmesurable appetit / & disordeyned coueytyse to etyn or to drynke [819] ¶ This synne corrumpid / al this world as is weel schewyd in the synne of adam & of eue. Loke ek what seyth seynt poule of glotenye. [820] Manye seyth seynt Poule goon of

[6-text p 659] whiche I haue ofte seyd to ȝow & now I seye it wepynge that been the enmyis of the croys of crist of whiche the ende is deth and of whiche here wombe is here god & here glorye in confusioun of hem that so deuouryn erthely thyngis [821] he that is vsaunt to this synne of glotenye he ne may no synne withstonde he mot been in seruage of alle vicis / for it is the deuillis hord there he hydith hym and restith [822] this synne hat manye spicis / ¶ The ferste is dronkenesse / that is the horible sepulture of mannys resoun / And ther|fore whan a man is dronkyn; he [folio 432b] hath lost resoun & this is dedly synne // [823] ¶ But sothly whan a man is not woned to strong drynk & parauenture ne knowith not the strenthe of the drynk or hath febilnesse in his heed / or hath trauayled / thour whiche he drenkyth the moore / Al be he sodeynly cauȝt with drynk it is no dedly synne but venyal [824] ¶ The secunde spece of glotenye is // that the spirit of a man / wexeth al trouble for dronkenesse; bereuyth hym the discrecioun of his wit. [825] ¶ The thredde spece of Glotenye is whan a man deuourith his mete / & hath not ryghtful manere of etynge. [826] ¶ The fourte is whan thour the greete habund|aunce of his mete. the humuris in his body been dis|temperede [827] ¶ The fifte is forȝetefulnesse be too meche drynkynge for whiche sumtyme a man forȝetith on the morwe what he dede at euyn or on the nyght be-forn

[828] ¶ In othere manerys been distynit the specis of glotenye aftyr seynt Gregorye ¶ The ferste is for to etyn be|fore tyme of etynge ¶ The secunde is whan a man get hym to delicat mete or drynk. [829] ¶ The thredde whan men takyn ouyr mesure ¶ The forte is curiositee with greet entent to makyn & apparaylyn his mete ¶ The fifte is for to ete gredileche. [830] ¶ These been the fyue fyngerys of the deuyllis hand be whiche he drawyth folk to synne