[6-text p 649] [717] certes thanne semeth it they shulle be turmentyd with the del in helle. but if they doo penitence /
[718] Than cometh the synne that men clepe Tarditas / as whan a man is to laterede or tariynge er he wole turne to god / And certes that is a grete folye / he is lyke to hym that falleth in the diche / & wole nat aryse / [719] And this vice comyth of a fals hope / that he thynketh / that he shalle lyue longe / but that hope failleth ful ofte //
[720] Thanne cometh lacchesse / that is he / that whan he begynneth any good werke anoon he shalle forlete it and stynte as doon they that han any wight to gouerne / and ne taken of hym no more kepe / Anoon as they fynden any contrarie / or any anoye // [721] These ben the newe shepehurdes that leten hire shipe wytyngly to renne to the wolfe that is in the breris / or do no force of hire owne gouer [Christ Church MS folio 267a] naunce / [722] Of this cometh pouerte / and destruccion bothe of spirituelle & temporelle thynges / Thanne cometh a maner cooldnesse that freseith alle the herte of man // [723] Than comyth vndeuocion thurgh whiche a man is blente As seith seint Bernard / & hath swiche langour in soule that he may neither rede ne synge in holy chirche. ne here ne thynke of noo deuocion ne trauaille with his handes in noo good werke that it nys to hym vnsauory / And alle appalled / [724] thanne waxeth he slow & slombry / And so is enclyned to hate & to Enuye // [725] thanne comyth the synne of wordly sorwe. swiche as is cleped Tristicia. that sleeth man as seith seint Poule / [726] For certes swiche sorwe wercheth to the deeth of the soule / and of the body also / For ther of cometh / that a man is anoyed of his owne lyfe / [727] wherfore swiche sorwe shorteth ful ofte the lyfe of a man er that his tyme by come by wey of kynde
