[6-text p 212] god & praye hym to dresse thy weyes / and looke þat alle thy conseils ben in hym for euere moore [2309] ¶ Seint Iame eek seith ‖ If any of yow / haue nede of Sapience / axe it of god / [2310] and afterward thanne shal ye take conseil in your self / & examyne wel youre thoghtes / of swiche thynges as yow thynketh / þat is best for youre profit [2311] and thanne shal ye dryue fro youre herte / thre thynges / that been contrariouse to good conseil / [2312] that is to seyn / Ire / Coueitise / & hastynesse
[2313] ¶ ffirst he þat axeth conseil of hym self / certes he moste be with-outen Ire / for many causes [2314] ¶ The firste is this ‖ he þat hath greet Ire & wrathe in hym self / he weneth alwey þat he may do thyng þat he may nat do ‖ [2315] And secoundly / he þat is Irous & wroþ / he ne may nat wel deme / [2316] and he þat may nat wel deme / may nat wel conseille ‖ [2317] The thridde is this / that he þat is Irous & wroþ as seith Senek ne may nat speke / but blameful thynges / [2318] and with hise viciouse wordes / he stireth oother folk to angre / & to Ire // [2319] And eek sire / ye moste dryue coueitise / out of youre herte / [2320] ffor the Apostle seith / þat Coueitise / is the roote of alle harmes / [2321] and trust wel / þat a coueitous man ne kan nat deme / ne thenke / but oonly to fulfille the ende of his coueitise / [2322] & certes / that ne may neuere been acompliced / for euere the moore habundance þat he hath of richesse / the moore he desireth [2323] ¶ And sire / ye moste also / dryue out of youre herte / hastifnesse / for certes [2324] ye may nat deme for þe beste / a sodeyn thoght þat falleth in youre herte / but ye moste auyse yow on it ful ofte [2325] for as ye herde her biforn / the comune prouerbe is this / that he / þat soone demeth / soone repenteth
[2326] Sire ye ne ben nat alwey / in lyke disposicion / [2327] for certes / som thyng þat som tyme semeth to yow / þat it is good for to do / another tyme / it semeth to yow the contrarie /
