[6-text p 410]
¶ But for to speke / of vertuous beautee
Line 211
Thanne was she / oon the faireste vnder the sonne
ffor poureliche / yfostred vp was she
No likerous lust was thurgh hir herte yronne
Line 214
Wel ofter of the welle / than of the tonne
She drank and for she wolde vertu plese
She knew wel labour / but noon ydel ese
Line 217
¶ But thogh this mayde / tendre were of age
Line 218
Yet in the brest of hir virginitee
Ther was enclosed / rype and sad corage
And in gret reuerence / and charitee
Line 221
Hir olde poure fader / fostred she
A fewe sheepe / spynnynge / on feld she kepte
She wolde noght been ydel / til she slepte
Line 224
¶ And whan she homward cam / she wolde brynge
Line 225
Wortes / or othere herbes / tymes ofte
The whiche she shredde / and seeth for his lyuynge
And made hir bed ful harde / and no thyng softe
Line 228
And ay she kepte / hir fadres lyf on lofte
With euery obeysance / and diligence
That child may doon / to fadres reuerence
Line 231
¶ Vp on Grisilde / this poure creature
Line 232
fful ofte sithe / this Markys sette his eye
And he / on huntyng rood per auenture
And whan it fil / þat he myghte hire espie
Line 235
He noght wit wantowne lookyng of folye
Hise eyen caste on hire / but in sad wyse
Vp on hir cheere / he wolde hym ofte auyse
Line 238
¶ Commendynge in his herte / hir wommanhede [folio 177a]
And eek hir vertu / passyng any wight
Of so yong age / as wel in cheere as dede
ffor thogh the peple / hath no greet insight
Line 242
