[6-text p 277]
[6-text p 278]
¶ O myghty Cesar / that in Thessalie
Agayn Pompeus / fader thyn in lawe
That of thorient hadde al the chiualrie
As fer / as þat the day bigynneth dawe
Line 3872
Thow / thurgh thy knyghthod / hast hem take & slawe
Saue fewe folk þat with Pompeus fledde
Thurgh which / thow puttest al Thorient in Awe
Thanke ffortune / that so wel thee spedde
Line 3876
¶ But now a litel while / I wol biwaille
This Pompeus / this noble gouernour
Of Rome / which þat fleigh at this bataille
I seye / oon of hise men / a fals traitour
Line 3880
His heed of smoot/ to wynnen hym fauour
Of Iulius / and hym the heed he broghte
Allas Pompeie / of Thorient conquerour
That ffortune / vn-to swich a fyn thee broghte
Line 3884
¶ To Rome agayn / repaireth Iulius [folio 97a]
With his triumphe / lauriat ful hye
But on a tyme / Brutus Cassius
That euere hadde / of his heighe estat enuye
Line 3888
fful pryuely / hath maad conspiracie
Agayns this Iulius / in subtil wise
And caste the place / in which he sholde dye
With Boydekyns / as I shal yow deuyse
Line 3892
¶ This Iulius / to the Capitolie wente
Vp-on a day / as he was wont to goon
And in the Capitolie / anon hym hente
This false Brutus / and hise othere foon
Line 3896
And stiked hym / with Boydekyns anon
With many a wounde / and thus they lete hym lye
But neuere gronte he / at no strook but oon
Or ellis at two / but if his storie lye
Line 3900
