[6-text p 276]
[6-text p 277]
¶ What prys were it to hym / thogh I yow tolde
Of Darius / and an hundred thousand mo
Of kynges / Prynces / Dukes / Erles bolde
Whiche he conquered / and broghte hem in-to wo
Line 3840
I seye / as fer / as man may ride or go
The world was his / what sholde I moore deuyse
ffor thogh I write / or tolde yow euere mo
Of his knyghthode / it myghte nat suffise
Line 3844
[T]welf yeer he regned / as seith Machabee [folio 96b]
Philippes sone of Macidoyne / he was
That first was kyng in Grece the contree
O worthy / gentil Alisandre allas
Line 3848
That euere / sholde fallen swich a cas
Empoysoned / of thyn owene folk thow weere
Thyn sys / ffortune hath turned in-to Aas
And for thee / ne weep she neuer a teere
Line 3852
¶ Who shal me yeue teeris / to compleyne
The deeth / of gentilesse / and of franchise
That al this world / weldid in his demeyne
And yet hym thoughte / it myghte nat suffise
Line 3856
So ful was his corage / of heigh emprise
Allas / who shal me helpe to endite
ffalse ffortune / and poyson to despise
The whiche two / of al this wo I wyte
Line 3860
[Julius Cœsar.]
By wisdom / manhede / and by greet labour [/ De Iulio Cesare]
ffrom humble bed / to Roial magestee
Vp roos / he Iulius the Conquerour
That wan al the Occident by land and see
Line 3864
By strengthe of hond / or ellis by tretee
And vn-to Rome / made hem tributarie
And sith of Rome / the Emperour was he
Til that ffortune / weex his Aduersarie
Line 3868
