[6-text p 275]
[6-text p 276]
¶ The wreche of god / hym smoot so cruelly [folio 96a]
That thurgh his body / wikked wormes crepte
And ther with al / he stank so horribly
That noon / of al his meynee þat hym kepte
Line 3808
Wheither so he wook/ or ellis slepte
Ne myghte noght for stynk of hym endure
Is this meschief / he wayled and eek wepte
And knew god / lord of euery creature
Line 3812
¶ To al his hoost and to hym self also
fful wlatsom / was the stynk of his careyne
No man / ne myght hym bere to ne fro
And in this stynk and this horrible peyne
Line 3816
He starf ful wrecchedly / in a monteyne
Thus hath this Robbour / and this homycide
That many a man / made to wepe and pleyne
Swich gerdon / as bilongeth vn-to pryde
Line 3820
[Alexander the Great.]
The Storie of Alisandre / is so commune [/ De Alexandro]
That euery wight þat hath discrecion
Hath herd som-what or al / of his fortune
This wide world / as in conclusion
Line 3824
He wan by strengthe / or for hys hye renon
They were glad / for pees vn-to hym sende
The pryde / of man and beest / he leyde adoun
Where so he cam / vn-to the worldes ende
Line 3828
¶ Comparison / myghte neuere yet ben maked
Bitwixe hym / and another Conquerour
ffor al this world / for drede of hym hath quaked
He of knyghthod / and of fredom flour
Line 3832
ffortune hym made / the heir of hire honour
Saue wyn and wommen / no thyng myghte aswage
His hye entente / in armes and labour
So was he ful / of leonyn corage
Line 3836
