[Holofernes.]
¶ Was neuere Capitayn / vnder a kyng [/ De Oloferno]
That regnes mo / putte in subieccioun
Ne strenger was in feeld / of alle thyng
As in his tyme / ne gretter of renoun
Line 3744
Ne moore pompous / in heigh presumpcioun
Than Oloferne / which ffortune ay kiste
So likerously / and ladde hym vp and doun
Til þat his heed was of / er that he wiste
Line 3748
¶ Nat oonly / that this world hadde hym in awe
ffor lesynge / of richesse / or libertee
But made euery man / reneyen his lawe
Nabugodonosor / was god seyde he
Line 3752
Noon oother god / sholde adoured be
Agayns this heste / no wight dorste trespace
Saue in Bethulia / a strong Citee [// Et fecerunt filij Israel / secundum quod constituerat eis sacerdos dom|ini Eliachym]
Where Eliachym / a preest was of that place
¶ But tak kepe / of the deeth of Oloferne
Amydde his oost he dronke lay a nyght
With-Inne his tente / large as is a berne
And yet for al his pompe / and al his myght
Line 3760
Iudith a womman / as he lay vpright
Slepynge / his heed of smoot and from his tente
fful pryuely she stal / from euery wight
And with his heed / vn-to hir toun she wente
Line 3764
[Antiochus.]
What nedeth it of kyng Anthiochus [folio 95b]
To telle / his hye Roial magestee
His hye pryde / hise werkes venymus
ffor swich another / was ther noon as he
Line 3768
Reed which that he was / in Machabee
And reed / the proude wordes / þat he seyde
And why he fil / fro heigh prosperitee
And in an Hille / how wrecchedly he deyde
Line 3772
