[6-text p 267]
¶ The Emperour of Rome / Claudius
Ne hym biforn / the Romayn Galien
Ne dorsten neuere / been so corageus
Ne noon Ermyn / ne noon Egipcien
Line 3528
No Surryen / ne noon Arabien
With-Inne the feeldes / þat dorste with hire fighte
Lest þat she wolde / hem with hir handes slen
Or with hire meynee / putten hem to flighte
Line 3532
¶ In kynges habit wenten hire sones two
As heires / of hir fadres regnes alle
And Hermanno / and Thymalao
Hir names weere / as Persiens hem calle
Line 3536
But ay ffortune / hath in hire hony galle
This myghty queene / may no while endure
ffortune / out of hir regne made hire falle
To wrecchednesse / and to mysauenture
Line 3540
¶ Aurelian / whan þat the gouernance
Of Rome / cam in-to hise handes tweye
He shoope / vp-on this queene / to doon vengeance
And with his legions / he took his weye
Line 3544
Toward Cenobie / and shortly for to seye
He made hire flee / and atte laste hire hente
And fettred hire / and eek hire children tweye
And wan the land / and hoom to Rome he wente
Line 3548
¶ Amonges othere thynges / that he wan
His Chaar / þat was with gold wroght & perree
This grete Romayn / this Aurelian
Hath with hym lad / for þat men sholde it see
Line 3552
Biforn his triumphe / walketh she
With gilte cheynes / on hire nekke hangynge
Corowned was she / as after hire degree
And ful of perree / charged hir clothynge
Line 3556
