[6-text p 265]
¶ But atte laste / hir freendes han hire maryed
To Onedake / a prynce of that contree
Al were it so / that she hem longe taryed
And ye shal vnderstande / how þat he
Line 3464
Hadde swiche fantasies / as hadde she
But nathelees / whan they weere knyt in feere [simul]
They lyued / in ioye / and in felicitee
ffor ech of hem / hadde oother lief and deere
Line 3468
¶ Saue o thyng that she wolde neuere assente
By no wey / that he sholde by hire lye
But ones / for it was hir pleyn entente
To haue a child / the world to multiplye
Line 3472
And also soone / as that she myghte espye
That she was nat with childe / with that dede
Thanne wolde she suffren hym doon his fantasye
Eft soone / and noght but ones / out of drede
Line 3476
¶ And if she were with childe / at thilke cast [folio 93a]
Namoore / sholde he pleyen thilke game
Til fully / .xl. dayes weren past
Thanne wolde she ones / suffre hym do the same
Line 3480
Al were this Onedake / wilde / or tame
He gat namoore of hire / for thus she seyde
It was to wyues / lecherie and shame
In oother cas / if þat men with hem pleyde
Line 3484
¶ Two sones / by this Onedake hadde she
The whiche she kepte / in vertu and lettrure
But now / vn-to oure tale turne we
I seye / so worshipful a creature
Line 3488
And wys ther-with / and large with mesure
So penyble in the werre / and curteis eke
Ne moore labour / myghte in werre endure
Was noon / thogh al this world men sholde seke
Line 3492
