[6-text p 263]
¶ In al that land / Magicien was noon [folio 92a]
That koude expounde / what that lettre mente
But Danyel / expowned it anoon
And seyde / Kyng god to thy fader lente
Line 3400
Glorie / and honour / regne / tresor / rente
And he was proud / and no thyng god ne dradde
And ther-fore / god greet wreche vp-on hym sente
And hym birefte / the regne þat he hadde
Line 3404
¶ He was out cast of mannes compaignye
With Asses / was his habitacion
And eet hey as a beest in weet and drye
Til þat he knew / by grace / and by reson
Line 3408
That god of heuene / han domynacion
Ouer euery regne / and euery creature
And thanne / hadde god of hym compassion
And hym restored / his regne and his figure
Line 3412
¶ Eke / thow that art his sone / art proud also
And knowest Alle thise thynges verraily
And art rebel to god / and art his fo
Thow drank eek / of his vessel boldely
Line 3416
Thy wyf eke / and thy wenches synfully
Dronke of the same vessels / sondry wynys
And heriest false goddes cursedly
Therfore to thee / yshapen ful greet pyne is
Line 3420
¶ This hand was sent fro god / that on the wal
Wroot Mane techel phares / truste me
Thy regne is doon / thow weyest noght at al
Dyuyded is thy regne / and it shal be
Line 3424
To Medes and to Perses / yeuen quod he
And thilke same nyght this kyng was slawe
And Darius / occupieth his degree
Though he ther to / hadde neither right ne lawe
Line 3428
