[6-text p 357]
And whan that I hadde / geten vn-to me
By maistrye / al the soueraynetee
And þat he seyde / myn owene trewe wyf
Do as thee lust the terme of al thy lyf
Line 820
Keepe thyn honour / and keepe eek myn estaat
After that day / we hadde neuere debaat/
God help me so / I was to hym as kynde [folio 68a]
As any wyf / from Denmark vn-to Inde
Line 824
And also trewe / and so was he to me
I pray to god / that sit in magestee
So blesse his soule / for his mercy deere
Now wol I seye my tale / if ye wol heere
Line 828
[The Wrangle between the Summoner and Friar.]
The frere logh / whan he hadde herd al this
Now dame quod he / so haue I ioye / or blys
This is a long preamble / of a tale
And whan the Somnour / herde the frere gale
Line 832
¶ Lo quod the Somnour / goddes armes two
A frere / wol entremette hym euere mo
Loo goode men / a flye / and eek a frere
Wol falle in euery dyssh and matere
Line 836
What spekestow / of preambulacioun
What amble / or trotte / or pees / or go sit doun
Thow lettest oure disport in this manere
¶ Ye woltow so / sir Somnour / quod the frere
Line 840
Now by my feith / I shal er that I go
Telle of a Somnour / swich a tale / or two
That al the folk/ shal laughen in this place
¶ Now ellis frere / I wol bishrewe thy face
Line 844
Quod this Somnour / and I bishrewe me
But if I telle tales / two or thre
Of freres / er I come to Sydyngborne
That I shal make / thyn herte for to morne
Line 848
