[6-text p 346]
I wolde noght spare hem / at hir owene bord
ffor by my trouthe / I quytte hem / word for word
As help me / verray god omnipotent
Togh I right now / sholde make my testament
Line 424
I ne owe hem nat a word / that it nys quyt
I broghte it so aboute / by my wit
That they moste yeue it vp / as for the beste
Or ellis / hadde we neuere been in reste
Line 428
ffor thogh he looked / as a wood leon
yet sholde he faille / of his conclusion
¶ Thanne wolde I seye / good lief taak keepe
How mekely / looketh Wilkyn oure scheepe
Line 432
Com neer my spouse / lat me ba thy cheke
Ye sholden be / al pacient / and meke
And han / a swete spyced conscience
Sith ye so preche / of Iobes pacience
Line 436
Suffreth alwey / syn ye so wel kan preche [folio 63b]
And but ye do / certeyn we shal yow teche
That it is fair / to han a wyf in pees
Oon of vs two / moste bowen doutelees
Line 440
And sith a man / is moore resonable
Than womman is / ye mosten been suffrable
What eyleth yow / to grucche thus and grone
Is it for ye wolde haue / my queynte allone
Line 444
Wy taak it al / lo haue it euery del
Peter I shrewe yow / but ye loue it wel
ffor if I wolde selle / my bele chose
I koude walke / as fressh as is a rose
Line 448
But I wol kepe it for youre owene tooth
Ye be to blame / by god I sey yow sooth
Swiche manere wordes / hadde we on honde
Now wol I speke / of my ferthe housbonde
Line 452
My ferthe housbonde / was a reuelour
This is to seyn he hadde a paramour
And I was yong and ful of ragerye
Stibourne and strong and ioly as a pye
Line 456
